Ogie Alcasid aka 'Boy Pick-Up,' handang makasagupa si Sen Miriam sa pick-up lines?

Interesado nga ba si Ogie Alcasid na makasagupa ng kanyang sikat na karakter sa Bubble Gang na si Boy Pick-Up ang pambato ng Senado sa pick-up lines na si Sen Miriam Defensor Santiago?

Sa mga speaking engagement ni Sen Santiago lalo na tungkol sa Reproductive Health Bill, naging tatak na ng mambabatas ang pagbitiw ng mga patok na pick-up lines bago niya talakayin ang seryosong usapin.

Ginagawa raw ito ng senadora para makuha muna ang atensyon ng mga tao lalo na ang mga kabataan upang makinig sa kanyang mga sasabihin.

Isa sa mga pumatok na pick-up lines ni Sen Miriam ay ang: “Masasabi mo bang bobo ako kung ilan lang ang laman ng utak ko?"

Sa panayam kamakailan ng showbiz reporter na si Nelson Canlas kay Ogie, inalam niya kung handa bang sagupain ni “Boy Pick-Up" ang palabang senadora.

“Wala tayong laban dun," natatawang tugon ni Ogie sa Chika Minute ng GMA News 24 Oras nitong Lunes.

Pero inamin ni Ogie na inimbitahan nila si Sen Miriam para makaharap nito si Boy Pick-Up sa Bubble Gang.

“Iniimbitahan namin siya sa Bubble Gang actually, sana makasali siya. Kung hindi man, sana sa movie," patungkol ni Ogie sa nilulutong "Boy Pick-Up The Movie."

Hindi na nga maawat ang pagsikat ng bagong karakter ni Ogie. Katunayan, may "Boy Pick-Up" shirt na sa clothing company ng yumaong si Francis Magalona.

Inihahanda na rin daw ang soundtrack ni Boy Pick-Up na pawang hip-hop music ang maririnig, ayon kay Ogie.

Source: http://www.gmanetwork.com/news/story/241536/showbiz/chikaminute/ogie-alcasid-aka-boy-pick-up-handang-makasagupa-si-sen-miriam-sa-pick-up-lines